سرائیکی نظم — اے میں وی چاہنداں
اے میں وی چاہنداں جو یار کیتے کئی سیارے تے زحل زہرے مریخ عطارد زمین سورج چندر تارے
بنڑا کے اکھاں جو ونج میڈا یار تیڈے کیتے اے ساری دنیا بنڑا ڈتی می۔
اے میں وی چاہنداں جو دل ربا دی ولیل زولفاں تے ودوھا دے حسین چہرے دی قسماں چاکے
میں اوکوں اکھاں جو تو جو دھرتی تے پیر رکھدیں میڈے ملائکہ درود پڑھدن۔
اے میں وی چاہنداں جو سجنڑ دے حسن و جمال تے ہک کتاب لکھاں
تے اوندے اندر اوندی محبت ثواب لکھاں
تے اوندا مکھڑا شباب لکھاں۔
اوندا پسینہ گلاب لکھاں۔
تے منکراں کوں عزاب لکھاں۔
کوئی او اخیری کتاب لکھاں۔
جو آوندا پڑھنا ثواب لکھاں۔
اے میں وی چاہنداں جو یار دا ہک محافظ ہوے۔
تے اوندے ہتھیں میں دو مونہیں تیغ ڈے کے اکھاں
جیہڑا ایندے راہ تے دھوڑ سٹے تو اوندا گاٹا لہا کے اکھیں
تیکوں نی لگدا جو ڈاڈھی ہستی دا لال اگئے۔
اے میں وی چاہنداں جو یار میڈے دیاں مٹھیاں گالہیں تو کئی نیوٹن
تے فیثا غورث قانون قاعدے بنڑا کے کھل کھل کے تاڑی مارن۔
اے میں وی چاہنداں سبھے قلندر کوئٹے دانتے ارسطو ہیگل حیران تھیون
جو سارے منطق نجوم ریاضی تے فلسفے دے پھٹے ہوئے ورقاں تے کیندا نور ڈسدے۔
سجنڑ دی چادر فلک بنڑاواں، سجنڑ دی مندری دھنک بنڑاواں
میں اوندی زولفاں چو رات کڈہاں، اوندے چہرے کوں ڈینہ بنڑاواں۔
کدی اوندی اکھیں کوں مینہ بنڑاواں۔
او اپنڑی اکھیں چو میکوں ڈیکھے
میں اپنڑے پرداں چو اونکوں ڈیکھاں۔
تے ہک فرشتے کوں عطا کر کے اکھاں اونکوں تو صرف اوندیاں گاہلیں ڈسیں
تے میں ایندو صرف ڈیہدا بیٹھاں۔
تے باقی دنیا کوں اکھ کوئی کم ایندی سفارش بغیر کوئی نی۔
اے میں وی چاہنداں جو یار کیتے نویں کوئی دنیا بنڑا ڈیکھاواں۔
مگر اوندا یار، اوندا محبوب، اوندا بندا، اوندا بشر ہئی۔
تے میڈا محبوب، میڈا شہ رگ شریک تھی کے وی اہدے دنیا دے ذرے ذرے وچ
گول میکوں کول کھڑ کے وی کھل کے اہدے جو گول میکوں۔
مومن مولئی۔
✅ Copied!
Leave a Reply