نظم
بابا سائیں فرمیندے ہن
ساڈا ویلا چنگا ویلا ہئی
ساڈا ویلا سادہ ویلا ہئی
ساڈے ویلے پگ دی قیمت ہئی
ساڈے ویلے گال انگوٹھا ہئی
ساڈے ویلے پردہ اکھ اچ ہئی
ساڈے ویلے گھراں اچ باریاں ہن
ساڈے ویلے یاریاں یاریاں ہن
ساڈے ویلے قاصد پکھنڑو ہن
ساڈے ویلے وقت پرچھا وچ ہئی
دھوں دس ڈیندے ہن وسوں دی
ساکوں تارے رستہ لیندا ہن
بابا سائیں فرمیندے ہن
جتھ شہرا دا چوک اے اوں ویلے
ٰایتھے ساڈے جوڑے واہندے ہن
جتھے کوٹھی اے سردارں دی
ایں جھاں تے بوھڑ ہندی ہئی
جتھاں ہاڑ اچ مال بندھیندا ہاں
بابا سائیں فرمیندے ہن
ساڈے گھر دے نال کراڑاں دا
ہک کھوھ ہئی واہندا ریندا ہئی
اک چٹھ درباری لٹھاں دی
اتھ پانی آن کے پیندی ہئی
اوہ پیار پریت دا ویلہ ہئی
نہ لٹھے کلمہ پڑھدے ہن
نہ کھوھ دا پانی کافر ہئی
سئیں مخمور قلندری