اساں زندگی منائی ہے

جِتھاں مَر ونجڑاں بنڑدا ہائی، اتھاں کِھل کِھل لنگھائی ہے
اساں زندگی گُزاری نئیں اساں زندگی منائی ہے

ناں کوٹھی ہے نا بنگلہ ہے ناں کئی اپنڑی سَواری ہے
اساں گھر چُوں کڈّھے ہوئے ہئیں ساڈی ڈکھ نال یاری ہے
تعلق ہی بنڑایا ہے، اساں عزت کمائی ہے

اساں زندگی گُزاری نئیں اساں زندگی منائی ہے

دھمالی ہائیں اساں لعلنڑ دی لالی وچ وی رنگے ہائیں
شکر ہے جو مراثی ہائیں اساں مولی توں چنگے ہائیں
ساڈی اپنڑی ہے ھک دنیا جتھاں اپنڑی خدائی ہے

اساں زندگی گزاری نئیں اساں زندگی منائی ہے

نا سُنی ہائیں ، نا شیعہ ہائیں ناں اے چیزاں منیدے ہائیں
محبت ہے ساڈا دھرم ، اساں انسان تھیندے ہائیں
ساکوں کئیں گاھل کڈھی تاں، اساں غزل سنائی ہے

اساں زندگی گزاری نئیں اساں زندگی منائی ہے

اساں بنڑ ٹھنڑ کے نکلے تاں ساڈے کیتے لَتّھیاں پَریّاں
ساڈے جوبن دی ھک جھلک تے پنج سو عورتاں مَریّاں
اساں پنج سو کوں بھا لئ ہے تے ہک عورت بچائی ہے

اساں زندگی گزاری نئیں اساں زندگی منائی ہے

اساں نوکر ہائیں ہر کئیں دے ساڈا سردار ہر کوئی ہے
ساڈا راجہ ہے تھل اپنڑاں ساڈی رانڑی ساڈی روہی ہے
ساڈی دنیا دے وچ جیویں، کوئی موچی ہے نہ نائی ہے

اساں زندگی گزاری نئیں اساں زندگی منائی ہے

کروڑاں دی آبادی وچ اساں ہک کیتے رہ بھجدے
اساں بَعیّت کیتی اوندی، اوندے کیتے ڈتے سجدے
ولا اے تھئے جو اوں بندے ساکوں جنت ڈکھائی ہے

اساں زندگی گزاری نئیں اساں زندگی منائی ہے

مُصّلے تروڑ سٹے جئیں ساڈے کیتے ڈتیاں مَنتاں
پتائے قرآن ہیٹوں او کیویں گزری ہوسی بختاں
جنازہ پڑھو چا ساڈا اوندی اج گُھنڈ کُھلائی ہے

جتھاں مر ونجڑاں بنڑدا ہائی اتھاں کِھل کِھل لنگھائی ہے
اساں زندگی گزاری نئیں اساں زندگی منائی ہے

نوشیروان اسفند

جاری ہے۔۔۔۔۔۔