ساکوں ایویں سنڑ۔۔۔۔!
جیویں کہیں توں نکھڑیا کوئی سنڑدے۔
ادھ رات کوں غزلاں نصرت دیاں۔

ساکوں ایویں چنڑ۔۔۔۔۔۔۔!
جیویں دال وچو بہہ چنڑدی ہے۔
کوئی بڈھڑی ہک ہک کنکر کوں۔

ساکوں ایویں جھنڑ۔۔۔۔۔۔۔۔!
جیویں ہر شئے ہردا آخری دا۔
کوئی زندگی لا کے جھنڑ گھندے۔

ساکوں ایویں پنڑ۔۔۔۔۔۔۔۔۔۔۔!
جیویں پتر جوان دی میت تیں۔
کوئی پنڑدے اپنڑی قسمت کوں۔

اساں تیڈے سنڑیے تھی پوسوں۔
اساں تیڈے چنڑیے تھی پوسوں۔
ساکوں ساریاں ہاراں بھل ویسن۔
اساں تیڈے جھنڑیے تھی پوسوں۔۔۔۔!

ساڈا ایویں تھی۔۔۔۔!
جیویں پوہ دی رات گزار کرائیں۔
کوئی دھند ءچ لوہندا ڈینہہ تھیندے۔

ساکوں ایویں گھن۔۔۔۔۔۔۔!
چا کھوٹا سکہ شہر جیویں۔
کوئی یوسف گھننڑ درک پووے۔

ساکوں ایویں مل۔۔۔۔۔۔۔۔!

جیویں کہیں تالاب دے پانڑی وچ۔
ملے نکھڑی جوڑی ہنساں دی۔۔۔!

ساکوں سانبھ ایویں۔۔۔۔۔!
جیویں مالک جبھ دے ترکے کوں۔
وچ بتری ڈندیں سانبھ چھوڑیے۔۔

ساکوں ایویں منگ۔۔۔۔!
جیویں اندھے اکھیں منگدے ہن۔
جیویں گونگے صرف آلا منگدن۔۔بیا کیا منگدن۔

ساکوں ایویں رنگ۔۔۔۔۔۔!
جیویں سک دے سکدے سانونڑ کوں۔
ست رنگی تانگھ دے رنگ رنگن۔

ساکوں ایویں پڑھ۔۔۔۔۔!
جیویں جھوک تیں شام کوں بھاہ تیں بہہ۔
پڑھے چھیڑو ڈوہڑے طارق دے۔

ساکوں ایویں لکھ۔۔۔۔۔!
جیویں منصف کہیں دی پھاسی لکھ۔
وت قلم کوں تروڑ سٹیندا ہے۔

ساکوں ایویں رٹ۔۔۔۔۔۔!
جیویں طوطا رٹے کہیں ناں کوں۔
جیویں بال رٹیندن قاعدے کوں۔

ساکوں ایویں رو۔۔۔۔۔!
جیویں کہیں کوں رونونڑ حق بنڑدے۔
یعقوب رنے جیویں یوسف کوں۔

ساڈے نال ایں کھل۔۔۔۔۔۔!
تیڈی کھل دے صدقے کھل پونون۔
بے موسمے پھل ہر موسم وچ۔

ساڈے نال ایں ٹر۔۔۔!
تیڈے نال ٹروں ایں حال ٹروں۔
ساڈی ٹور تیں مور وی رشک کرن۔

ساکوں ایویں جی۔۔۔۔۔!
جیویں پھاسی لگدا شخص کوئی۔
جیوے آخری رات دے ساہ ساہ کوں۔

ساکوں ایں سنڑوا۔۔۔۔۔۔۔!
تیڈی سنڑدیں ہوئیں۔
ساڈے ساہ نکلن۔۔۔تیڈی جان چھٹے۔

ساکوں ایویں بھل۔۔۔۔۔۔۔!
جیویں نانگ دی کھڈ ءچ ہتھ پا کے۔
کوئی ماندرا مندر کو بھل ونجے۔

ساکوں ایویں سڈ۔۔۔۔۔۔۔۔!
جیویں دریا بڈدا شخص کوئی۔
کہیں ناں دا آخری سڈ مارے۔

ساکوں ایویں کج۔۔۔۔۔۔۔۔!
وسے واچھڑ جیویں آلھنڑے وچ۔
کوئی پکھی اپنڑے بال کجے۔

ساکوں چھوڑ ایویں۔۔۔۔۔۔!
جیویں کہیں دے ہکے آکھیے تیں۔
20 سال دی سگریٹ کوئی چھوڑے۔

حاتم بلوچ
#followerseveryone