#نظم

کل میں شہر دی گلی گھن کے گزرنڑ لگاں
بھینڑ بھرا ڈو بڈھڑی ما نال روندے بیٹھن
اہدے بیٹھن عید دا ڈینہ ہے
ہر کہیں نویں کپڑے پاتن
ہر کہیں نویاں جتیاں پاتن
ہر کہیں ہتھیں مہندیاں لاتن
اساں کجھ نئیں لاتا اماں
اساں کجھ نئیں پاتا اماں
جیرھے ڈینہ دا ابا ٹر گئے
رج کے ٹکر کائنی کھادا
رج کے ستے کائنی اساں
کل ہک مسجد دے وچ اماں
مولی صاحب تقریر ءچ آکھے
جیرھا شودا کلہا ہوندے
اوندے نال تاں اللہ ہوندے
یاتاں اساں کلہے کائنی
یا وت ساڈا اللہ کائنی
توں ڈس اماں اہدی ہانویں
میڈے ڈھیر بھرا ہن جیون
میڈے پیو تے ما ہن جیون
ساڈی ڈھیر سنبھال کریسن
ساکوں اپڑیں نال ٹریسن
ساکوں اپڑیں بال بنڑیسن

ہیں ڑی اماں ہنڑ او کتھن۔؟

بڈھڑی ما دی دھاڑ ہے نکھتی
ہنجوں کیر تے آکھس بچڑے
کائنی میڈا بھینڑ بھرا کوئی
کائنی تہاڈے مامے شامے
کل میں گئی ہاں گھر ابے دے
حولیں حولیں اپڑنے وڈے ویر دے کن اچ اتنا آکھم
ویرنڑ میڈے بال یتیم ہن
میکوں میڈا جو کجھ بنڑدے
حصہ ڈیوو
میڈے گھر دا راشن کائنی
میں بالیں دے کپڑے گھنساں
یکدم میڈا ویرنڑ اٹھیے
اینجھی اونجھی آکھنڑ لگ گئے
منہ تے چاٹاں مارنڑ لگ گئے
آکھس تیڈا حصہ کائنی
اساں تیڈے کجھ نی لگدے
ابا ساڈے ناویں کر گئے
ترکہ سارا
ساڈے کیتے توں وی مر گئیں
جیرے ڈینہ دا ابا مر گئے ۔۔۔۔۔۔

#مناف #واقف