میڈا پاک بصیر علیم اللہ

میڈا پاک بصیر علیم اللہ، میں موسی’ ناں پر دل آہدے، کڈی پیراں کوں کوہ طور بنڑائیں۔

کجھ ھج دے جھیڑے ہوندے ھن، میڈا دل آہدے تیکوں آکھ ڈیواں، مزدور دا یار سڈاویں توں، وت رزق ڈیویں جیکوں چاہویں توں۔

الکاسب لکھ کے تلیاں تے، والرازق لکھ کے متھڑے تے، جڈاں محشر ملسیں گل لگ کے، مخلوق دے سامنڑے آکھساں میں۔

میڈے پٹکے تائیں ہتھ پئیندی ہئی، میڈی غیرت نال الیندی ہئی، تیڈی غربت چوک ءچ کھڑ کھڑ کے، میکوں ماء دیاں گالھیں ڈیندی ہئی۔

ہر کہیں تے رحم دا وعدہ ہئی، میڈے عملاں نال حساب نہ کر، ہر بشر کوں ستر ماء کولوں، جے ودھ کے پیار کریندا ہئیں، وت پیار دے نال ڈسا میکوں، انج ڈیکھ کے جیندی رہ سگدی؟

میڈی کنڈ تے چھالے سیمنٹ دے، میڈی ماء ڈیہدھی تاں سہہ سگدی؟ اے جانڑدا ھاں تیڈے ھتھ کونھی، پر دھرتی تے جیہڑے ہتھ تیڈے، مخلوق دا رزق ونڈیندے ھن، اوں ہتھ تھوں چاٹاں جھل آیاں، تیڈے ناں سڈ سڈ کے ول آیاں۔

اے جانڑدا ھاں تیڈے کن کونھی، پر آنڑ علیم دے کناں نل، جیندا بیلچہ ترٹ گئے کنڈ وانگوں، اوندے وینڑ سنڑیں ادھ راتیں کوں۔

اے جانڑدا ھاں تیڈی اکھ کونھی، پر آنڑ بصیر دی اکھیں نل، اوں بیوہ دے ہتھ ڈیکھ کڈاہیں، جیہڑی ہر جمعرات کوں کریاں تے، تیڈے ناں دھاگے بنھدھی اے۔

جڈاں ترٹ مویا مزدور کوئی، گھر ولدائے تھک کے شام ایلے، ہر بال دے لب تے لیکے ہوئے، چپ چاپ صحیفے پڑھدا ہے، قرآن دے ورقے بھل ویندے، اونکوں لم یلد ویلد دا وکھرا معنی کھل ویندے۔

ہک حور دا لالچ مئولی تھوں، میڈے بال مشوم کہیندا ریہے، توں شہ رگ تھوں نزدیک ہانویں، توں کول کھلو کے ڈیہدا رہیں، میڈا ماتم عرش ہلیندا ریہے۔

تہوں ہر مزدور دی بھینڑ کوں میں، ہتھ بنھ کے عرض ہمیش کیتے، کڈی جمدے ویر دی انگلیں کوں، ادھ رات کوں جاگ کے چمے نئیں، ایندی روز گھڑولی چاوے نئیں، ایندے منہ تے بوسے نہ ڈیوے، ہتھ ہونٹ دے ھیلک نہ ہوون، ایندے اندر مینڑھیں ساھنوڑیں ھن، ایندے چہرے جھنڑکاں جھلنڑیاں ھن، ایندے ہتھ ہتھواڑے چاونڑیں ھن۔

اوں ڈینہ تھوں پہلے روٹی کوں، جڈاں بھل کے سجدہ کر باہواں، کوئی کافر آکھ کے مار ڈیوے، میڈے ھاں تے پھٹ ھن غیرت دے، کجھ زخم جگر دے دھونڑ ڈے، بیا جیکر کجھ نی کر سگدا، میکوں ھاں نل لگ کے رونڑ ڈے۔

میڈا پاک بصیر علیم اللہ، میں موسی’ ناں پر دل آہدے، کڈی پیریں کوں کوہ طور بنڑائیں۔

— مومن مولائی