مخمور قلندری
سرائیکی وسیب دی مٹھی شاعری
کوئی ہووے ہا
جیہڑا آکھے ہا
گھر شام کوں جلدی آیا کر
تیڈے نال دے سینگھے ڈیکھ تاں سہی
کوئی چندر دے سیراں کر آئے
کوئی تارے تروڑ آسمانوں آئے
کوئی روہ دی چوٹی چم آئے
کوئی قید ہوا کوں کیتی پئے
تیڈے نال دے سینگھے
آکھ کرائیں کوڑیجے ہا
کوئی ہووے ہا
جیڑھا آکھے ہا
توں اتنی سگریٹ کیوں پیندیں؟
تیڈا چہرہ پیلا کیوں تھی گئے؟
ونج گھر دو ونج، میڈے آندیاں تئیں
تیں گھر توں بہر نکلنا نئیں
جیں ویلے گھر دو آوے ہا، سمجھاوے ہا
کوئی ہووے ہا
جیڑھا آکھے ہا
تیڈی رات دی روٹی ٹھر گئی اے
مخمور زمانہ ٹھیک نوی
گھر شام کوں جلدی آیا کر
میکوں بابا اج احساس تھئے
کوئی ہووے ہا
جیڑھا آکھے ہا
#SaraikiPoetry #Waseb #MakhmoorQalandri
Copied!
Leave a Reply