گودا
گودا تیڈی وستی دے وچ

تریجھا گھر ہے سڑک کنارے
ھوں گھر دے کئی بال نمانے
ترائے ڈینہاں توں بکھے ہینی‎
اسلوں گودا ڈکھے ہینی
اج تاں حال حوال گھنی چا
ڈکھیں دی اج بھال کریں چا

گودا تیڈی وستی وچ

اماں حاجنؕ دی دھی رانی
‎بیٹھئیں بیٹھئیں بڈھڑی تھی گئی‎
ڈاج دا ربھڑ مکیا کینی
اکھ توں پانی رکیا کینی
ہوندا مسئلہ حل چا کر سئیں
ہوندے ڈاج دے پیسے بھر سئیں

گودا تیڈی وستی وچ

ویندے سال سیلاب ہا آیا
ہر پاسے ہا موت دا سایہ
شہر وچوں کجھ لوگ آے ہن
پچھدے ہن کہ گودا کتھ اے
میں آکھیا کہ گودا ساڈا
موئیل ہے بیا

ہا ہا گودا میں آکھیا ہم

گودا ساڈا اکھیں ألا اندھا ہے
کجھ ڈسدا کینس
کن وی ہینس سنڑدا کینی
لب دے ھوندیں بول نی سگدا
تول برابر تول نی سگدا
رب دا ڈتا سب کجھ ہس بیا
ول وی گودا بکھا ہے بیا
غربت ماریا بکھ توں مردے
گودا آہدے میڈا کیا ہے
عزت وگدی ہے وستی دی
گودا آہدے میڈا کیا ہے
گودا حق دا گودا بنڑ وے
ساڈا جیونڑ سوکھا کر وے
گودا حق دا گودا بنڑ وے

شاہد اویس شاہد
Follow Faiz Ahmed Shazim