غزل
اساں اپنْے مقدر دے اتے تقدیر دے مجرم
اساں سسڑی دے قاتِل ہیں اساں ہیں ہیر دے مجرِم

اساں مجرِم ہیں خوابیں دے اساں مجرم ہیں نندریں دے
اساں ہر خواب دی روندی ہوئی تعبیر دے مجرِم

اساں قسمت مقدر تے جیڑھا نِت دوش ڈٖیندے ہیں
اساں تاں آپ ہیں رل گٖئی رُٹھی تقدیر دے مُجرِم

اساں تاں اُنس دے نقشے اُتے پورے نہیں اُتریے
میڈٖا شاہکار تیڈٖی ہیں اساں تصویر دے مجرِم

اجٖاں تانْی زمانے کوں اساں سمجھے نِسے تاں ول
اساں اسلاف دے پٹکے دی ہیں ہر لیردے مُجرِم

جڈٖاں نِکھتا ہے ساہ ساڈٖا ولا محسوس تھئے ساکوں
ریہے ہیں آپ جو جیون دی ہر تدبیر دے مجرِم

شررؔ ساڈٖیں زبانیں کوں جیڑھے چُپ دے لگٖے جندرے
اساں اسلام دے مُجرِم اساں کشمیر دے مُجرم

سئیں شبیر شرر
Follow Faiz Ahmed Shazim