ابن مزدور

لاہور توں ولدیاں گڈیاں دے

جڈاں ہارنڑ سنڑدے رو پوندے

کہیں کوچ دے اگلے شیشے تے

جڈاں بکھر پڑھدے رو پوندے

جیہڑا کھل ڈھاندے یاراں وچ

جیہڑا گاونڑ گاندے یاراں وچ

ادھ رات کوں ما دے بکسے چوں

کوئی فوٹو چائیندے رو پوندے

اے مل دے مالک کیا جانڑن

او لگ ءچ منجا کیوں پائیندے

جڈاں نکڑی بھینڑ دی یاد آوئیس

او آپ کوں ڈیہدے شیشے وچ

کڈی سگریٹ لا کے کونے تے

بہہ کندھاں نال الیئندا ہے

کڈی واء نل جھیڑے لائیندے ہے

کندھ نال مخاطب تھی آہدے

سنڑ گل بابا نراض تاں نئیں

ونج رس کے ستاں ایں قبراں وچ

بھلا پیو کوئی رسدن پتراں تھوں

اچھا سنڑ بابا ہک گالھ ڈسائیں

جڈاں وسدے مینہہ ءچ ہک واری

میکوں مسجد چھوڑنڑ گئے ہاوے

تیڈی جیب ءچ عینک ترٹ گئی ہئی

میں تروڑی ہئی

جیہڑی گاں دی گانی گل گئی ہئی

او میں چائی ہئی

ونج گھنگھرو لائے ھم سائیکل کوں

نئیں بولدا بابا ڈیکھ اماں

توں گالھ ڈسا

جیڑے گھر دے لمے نلکے تے

میں بوٹے لائے ہن ٹھیک کھڑن

جڈاں آیا ھم میڈے چار کبوتر ہوندے ہن

ہنڑ ڈھیر ہوسن ہنڑ کتلے ہن

بیا رونڑق ٹھیک اے وستی دی

نیٹ ہنڑ وی لگدے ملکاں دا

سچ شادی تھئی اے لیلی’ دی

ھاں نال سرانڑاں لا کے نت

ایہے وینڑ کریندا سم ویندے

میڈا مالک تیڈے ہتھ کنمبدے

میڈا مالک تیڈا ھاں لاہندا

وت کن الویندو ڈیہدا میں

کڈی چھ بھینڑیں دا ویر ہوندوں

تیڈی بڈھڑی جئی ہک ماء ہوندی

پردیس بنڑیندوں پچھدا میں

مزدور رویندوں ڈیہدا میں

مومن مولائی