چھیکڑی خط

تیڈے بوچھنڑ توں جند وار ڈیواں
تیڈی نتھلی توں قربان تھیواں
تیکوں یاد کھڑائے تائیں آکھیا ہائی
میکوں ڈوجھا ساہ وی ناں آوے
تیڈے نال جڈاں بئی مان تھیواں

تیڈی دوزخ دوزخ سنڑدے ہُوئیں
اساں ست ست ٹیم نماز پڑھی
کئی مسجد، مندر چھانڑ کرائیں
تیڈے کیتے مذبی تھائے ہاسے
تیکوں ڈھیر جنون ھن جنت دے
تیکوں یاد ہوسی تیڈے کانڑ اساں
بہلول دے در تک گئے ہاسے

تیکوں یاد ودائے ناں من تا سہی۔۔۔

تیڈے کانڑ میں وستی کٹھی کر
ہر شخص کوں وکھرا آکھیا ہائی
چلو جیندیاں تاں اساں کٹھے ہائیں
ساکوں مرنڑ دے بعد وی نال رکھاۓ
جڈاں گھر دو ویندی ہائیں بس دے وچ
میں ستر سیٹ کوں آھدا ہم
اللّٰہ واسطے ایندا خیال رکھائے

تیکوں یاد ودائے یا بھل گئ ہیں۔۔۔

میڈی جندڑی تیڈیاں اکھیں وچ
میں خواب ڈٹھے کئی سالاں دے
کیوں بھل گئی انہاں گاھلیں کوں
جڈاں ساری رات قرآن وچوں
ناں لبھدے ہاسے بالاں دے

میں آکھیا ہائی ھک دھی ہوسی
جیڑھی میڈی چھیکڑی آس ہوسی
تائیں آکھیا ہائی میڈے سِر دا سائیں
ساڈا پہلا پتر عباس ہوسی

تیکوں یاد کھڑائے تیڈے نال جڈاں
میں چھیکڑی رات گزاری ہائی
تیڈے نال ھک بحث مباحثے وچ
میڈی وہویں سگریٹ جاری ہائی

تائیں آکھیا ہئ ایں دھرتی تے
سب کتے بلے ٹھیک ھن پۓ
سب پکھڑو شکھڑو چنگے ھن
انسان ھکو بدنیتا ہے
کل یونین کونسل وچ گیاں
تیڈے پہلے پتر دا ناں سنڑ کے
روح خون دا ماتم کیتا ہے ۔۔۔۔۔🙏

نوشیروان اسفند