کراڑی
کلام: مومن مولائی
اج شہر ءچ شور اے کرکٹ دا
ھن نعرے میچ دے جیتنڑ دے
ایں جیت کنوں میں ہر گئی آں
میں ڈر گئی آں
میڈے ھاں دی پاک سفیل اتے پئے برتن کنمبدن یاداں دے
میڈے پیکاں دی فریاداں دے
میکوں نعراں وچ دبکار سنڑیندن بوٹاں دے
انہاں بوٹاں دے جئیندی پالش وچ میڈی کالی قسمت چلکدی ہئی
انہاں بوٹاں وچ میڈا بوچھنڑ ہئی
اوندے پیراں وچ میڈی ہنجوں ہن
اس ٹیشن تے میڈی یاداں ہن
اس مٹی وچ میڈے لگدے ہن
میڈی ماء دے لہو رخسارے ہن
میڈے پیو دی اکھ ءچ تارے ہن
جند وار ڈیندی اوندی ویل کنوں
میڈی بھینڑ دے نال یعقوب وانگوں میڈی اکھیں ڈھئے گیاں ریل کنوں
ہک ڈبے وچ میڈا ھاں رہ گئے
بئے ڈبے وچ میڈے ڈاج دے برتن ایں کھنڈ گئے
جیویں تیر تھوں چھوٹے کربل وچ
جیویں لاش دے ٹوٹے کربل وچ
بھگوان او تیڈے پیارے ہن جئیندے پتر ولائے نی کھوہاں چوں
جیندے لگداں دے جیندوں اج تائیں چولے نئیں اپڑے میں او قسمت دی ماڑی آں
میں واقعی شاید کراڑی آں
کاپی ہو گئی ✓
Leave a Reply