غزل | اڄ تاں منظر ہور نظر دے
اڄ تـاں مـنـظر ہور نظردے
مـونجھـا مـن دا مور نظردے
اوکـوں آکھو تھل وی ݙیکھے
جـیـکـوں صرف لہور نظردے
دین دے فرقے کیتی رکھدے
مُـلاں ڳـوہـے بھـور نظردے
چندر مریخ دے پرلے پاسوں
سـسـی دا بَھـنـبھـور نظردے
نـچـݨ والـے نـچـدے پـئـے ہِـن
جیندے ہتھ ہـے ݙور نظردے؟
ہـر مـشکل مظلـوم دے حصے
ظلم کوں ہر جاہ زور نظردے
پیاری چیز ونڄیج ونڄے تاں
ہر ہـک بـنـدہ چـور نظردے
لـڳـدے حیدر جھـوک لُـݙا ڳے
جیہرا شـہـر اِچ شـور نظردے
Leave a Reply