میڈا بابا میں نل باہندا ہے
ایں گال تے اڑیا راہندا ہے

تیکوں کئیں آکھے اے سوکھی ہے
میڈا پُتر جوانی اوکھی ہے

حالی منہ تے خون ہے مستیاں ہن
تیڈے کانڑ حالی سنگتاں سستیاں ہن

جڈاں ہستیاں مستیاں مُک ویسن
تیڈیاں ساریاں سنگتاں رُک ویسن

تیکوں ڈیکھ کے اے سُنجڑیسن نا
تیکوں اوکھ اچ پُتر الویسن نا

میں وی سنگت اچ زندگئ گالی ہے
ہر یار دی یاری پالی ہے

ہُنڑ سُدھ پئی ہے کیا یاریاں ہن
ایویں مُفتیاں وقت گُزاریاں ہن

میڈے جیب اچ جے تئیں مال ہئی پیا
میڈا ہر ہک سنگتی نال ہئی پیا

ول اوتری غربت گل پئی ہے
میڈے بخت دی سحر وی ڈھل پئی ہے

میں توں سنگتی وی منہ موڑی گئن
میکوں بھینڑ بِھرا وی چھوڑی گئن

اج ڈیکھ میں کینجھے حال اچ ہاں
تیڈے سامڑے وقت زوال اچ ہاں

تیکوں آہداں عامر خیال کری
نہ اپڑے خاب پامال کری

میں وانگ توں وقت ونجاوی نہ
توں جھا جھا سنگتاں لاوی نہ

میڈا بابا میں نل باہندا ہے
ایں گال تے اڑیا راہندا ہے