تم سے دوری ستا رہی ہے مجھے
موت آنکھیں دکھا رہی ہے مجھے
دکھ بھری دنیا میں فقط وہ آنکھ
دیکھ کر مسکرا رہی ہے مجھے
اب کے آنے میں جلدی کرنا دوست
رت جدائی کی کھا رہی ہے مجھے
میری ہمت جواب دے دے گی
دل کی حالت بتا رہی ہے مجھے
کیا ضرورت ہے ساز و سر کی بھلا
جب محبت ہی گا رہی ہے مجھے
کیسے ناکام لوٹتی میں حیا
ماں جو دیتی دعا رہی ہے مجھے
دشت وحشت میں اک تمھاری یاد
جینے کا حوصلہ، رہی ہے مجھے
اتنی پیچیدہ میں نہیں تھی حیا
زندگی کیا بنا رہی ہے مجھے
حیازہرہ۔