غزل
ڈسا وے سانول تیڈی اساکوں جے مونجھ آوے تاں کیا کریجے؟
تیڈے وچھوڑے دا ڈکھ اساکوں جے آ ستاوے تاں کیا کریجے؟
اساں فقیریں تے رنج نہ تھی اساڈا کوئی قصور کائنی،،
خدا دی قسم اے تیڈی محبت نہ ھاں توں لہوے تاں کیا کریجے؟
تیئں خود قسم ڈے تے آ چھڑائی ہئی شراب بے زار مئے کشاں توں،،
تیڈی قسم ڈے تے کوئی اساکوں جے ول پلاوے تاں کیا کریجے؟
وفا دے رنگیں دےوچ سجی ہوئی تیڈے خیالیں دی ایہ غزل وی،،
اداس موسم دیوچ اساکوں جے کوئی سنڑاوے تاں کیا کریجے؟
عجیب عشق اے تیڈی گلی وچ اجاں وی ہتھ بدھ کے ائے کھڑے ہیں،،
تیڈا ایہو عشق ساکوں جاہ جاہ ودا نچاوے تاں کیا کریجے،،
اساکوں غیور تیڈے غم بن کہیں دی بیعت قبول کائنی،،
ڈسا ایں ویلے دی کربلا وچ کوئی سر لہاوے تاں کیا کریجے؟
سئیں غیور بخاری