میں موسیٰ ناں پر دل آہدا اے، کڈیں پیراں کوں کوہِ طور بݨا
میڈا دل آہدا اے تیکوں آکھ دیواں، مزدور دا یار سݙاویں توں
وت رزق ݙیویں جیویں چاہویں توں
الکاسب لکھ کے تلیاں تے، ول رازق لکھ کے متھڑے تے
جݙاں محشر ملسوں گل لگ کے، مخلوق دے سامنے آکھساں میں
میڈے پٹکے تائیں ہتھ پیندی ہئی، میڈی غیرت نال الیندی ہئی
تیڈی غربت چوک وچ کھڑ کھڑ کے، میکوں ماں دیاں گالیاں ݙیندی ہئی
میڈے عملاں نال حساب نہ کر، ہر کہیں تے رحم دا وعدہ ہئی
ہر بشر کوں ستر ماں کولوں، جے ودھ کے پیار کریندا ہیں
وت پیار دے نال ݙسا میکوں، انج دیکھ کے جیندی رہ سگدی؟
میڈی کنڈ تے چھالے سیمنٹ دے، میڈی ماں ݙیہدی تاں سہ سگدی؟
اک حور دا لالچ مولیٰ توں، میڈے بال معصوم کوہیندا رہیں
توں شاہ رگ توں نزدیک ہاویں، توں کول کھلو کے ݙیہدا رہیں
میڈا ماتم عرش ہلیندا رہیں
تاں اوں ہر مزدور دی بھینڑ کوں میں، ہتھ بدھ کے عرض ہمیشہ کیتے
کدی سمدے ویر دی انگلی کوں، ادھ رات کوں جاگ کے چمے نئیں
ایندی روز کھݙونی چاویں نئیں
ہاتھ ہونٹ دے ہیلک نہ ہوون، ایندے چہرے جھڑکاں جھیلیاں ہن
ایندے اندر میہنے سامہیں ہن، ایندے ہتھ ہتھوڑے چاویں ہن
اوں ݙینہہ توں پہلے روٹی کوں، جݙاں بھل کے سجدہ کر پواں
کوئی کافر آکھ کے مار ݙیوے، میڈے ہاں تے پھٹ ہن غیرت دے
میکوں زخم جگر دے دھووݨ ݙے
توں بھلا جے کچھ نئیں کر سگدا، میکوں ہاں نال لگ کے رووݨ ݙے!