عشرت لغاری ❤️

تیکوں بخت جو ہے پرواہ کائنی …
مجبور جو ہیں بیا راہ کائنی …
20 سال تونڑیں جھر جنگلیں وچ تیڈا مال چریندا رہے گیا اے….
تونڑیں آپنڑیں چیکدے رہ گئے نس تیڈے بال رہیندا رہ گیا اے…
ادھ رات تونڑیں جیندا بڈھڑا پیو تیڈے پیر دھویندا رہ گیا اے…
ارمان تھیندے انسان ہسے اوں پیو دے پتر دی جاہ کائنی..
تیکوں بخت جو ہے پرواہ کائنی …
مجبور جو ہیں بیا راہ کائنی …

سر چٹا ہس ہتھ کالے ہن گھر تیڈے دے تھاں دھو دھو کے…
تیڈی بچت پروتھ تے ڈینھ گزرس بھاویں کھل کھل کے بھاویں رو رو کے …
تیڈے بالیں کوں بیٹھی لیندی اے او اج وی مہندیاں لو لو کے…
اوندے سر دا بوچھنڑ لیراں اے جئیں منگی کوئی تنخواہ کائنی …
تیکوں بخت جو ہے پرواہ کائنی …
مجبور جو ہیں بیا راہ کائنی …

تیڈے گھر دی سرت سنبھالی ہس تھی اولے گھولے گھمدی اے …
تیڈے بال سمال پلنگیں تے آپ بھوئیں دی کنڈ تے سمدی اے …
تونڑیں آپنڑاں ہکو پتر ہسی تیڈے ستے پتر کوں چمدی اے….
اوں نمک حلال دا حق کھا گئیں کیا تیڈے کانڑ گناہ کائنی …
تیکوں بخت جو ہے پرواہ کائنی …
مجبور جو ہیں بیا راہ کائنی …

جہڑی سجھ ابھرے توں بہوں پہلے تیڈیاں آن بہاریاں ڈیندی اے …
گھر کلہے بال سمال کرائیں تیڈے بالیں کوں آن چیندی اے…
خود میلی کچ گزریندی اے تیڈے پتر کوں دھو پولیندی اے…
کجھ غیرت کر ایکوں پنشن ڈے ایکوں کم گزران دا ساہ کائنی…
تیکوں بخت جو ہے پرواہ کائنی …
مجبور جو ہیں بیا راہ کائنی …

تیکوں بخت جو ہے پرواہ کائنی …
مجبور جو ہیں بیا راہ کائنی …
سئیں عشرت لغاری صاحب