تکرار
میں آکھیے جان قبول کرو
اوں آکھیے ول نادان نہ بݨ
میں آکھیے ݙکھ دا دارو ہاں
اوں آکھیے بس لقمان نہ بݨ
میں آکھیے سُکھ دا سایہ ہاں
اوں آکھیے ہُݨ اسمان نہ بݨ
میں آکھیے ڳل چا لانویں ہا
اوں آکھیے ریشمی تھان نہ بݨ
میں آکھیے ڈھیر ضرورت ہے
اوں آکھیے وانگ جہان نہ بݨ
میں آکھیے در تے ٹُر آنواں
اوں آکھیے سئیں مہمان نہ بݨ
میں آکھیے توں کوئی یوسف نئیں
اوں آکھیے توں کِنعان نہ بݨ
میں آکھیے سب کجھ لِکھ ݙیواں
اوں آکھیے شاہ سلطان نہ بݨ
میں آکھیے خادم رہ ویساں
اوں آکھیے سِر احسان نہ بݨ
میں آکھیے انت ولا ولسیں
اوں آکھیے ہا غُستان نہ بݨ
میں آکھیے حیدر سوچ تے ݙس
اوں آکھیے سیفل خان نہ بݨ
Leave a Reply