غزل | آخر کار تماشے کیتن
آخــر کــار ! تماشے کیتن
میں تھـک ہـار تماشے کیتن
گھـر دا مـالـک چـور بݨا تـے
چـــوکـــیــدار تماشے کیتن
سِــک صدمے تے صبر نہ آیا
ہنجھ ہـر وار تماشے کیتن
مرض محبت مونجھ مسائل
تـہوں! بـیـمـار تماشے کیتن
غـیـریـں نـال صلاحیں کرتے
مــیـݙے یـــار تماشے کیتن
کجھ حـالات مـناسب کینی
کجھ اخــبــار تماشے کیتن
ڈھـیر محبتاں کینی کیـتیاں
بـس ݙو چـار تماشے کیتن
سـاݙے نال کـہـانی دیـوچ
ہـر کــــــردار تماشے کیتن
میں اُرواروں چپ چا کیتی
اوں ونـڄ پــار تماشے کیتن
کچی فـصـل اڄـاڑ کراہـیـں
اُلـٹـا جھــــــار تماشے کیتن
حـیـدر شـئیت پـرایا پـکرے
رشـتـے دار! تماشے کیتن
Leave a Reply